搬屋好辛苦？未必…

小編最近搬屋，因為準備不足，結果搬之前一晚，執屋到凌晨四點半仍未完成。過程中低估了家中雜物的數量，執出來先發現紙箱多到好似七仔貨倉，結果只能夠即場「磅水」給師傅。為免大家步小弟後塵，以下貼士請各位貼身收藏，有需要時服，無需要都希望日後不會中伏。

貼士：

1. 選擇搬運日期時，若想選擇星期六、日，一定要早兩星期前預約。好多人鍾意用通勝擇日搬屋，如果不信玄學，不如索性避開搬屋吉日，一於輕輕鬆鬆杜如風
2. 搬屋公司提供的紙箱欠缺彈性，最好只用來放碗碟、書本、微型音響及電腦等；衣服鞋襪雜物最好用紅白藍袋裝載，因為可以塞多一點，避免紙箱「爆數」、銀包穿窿
3. 舊報紙包碗包碟包玻璃超有用，不妨儲備一大疊
4. 有良心的話不要整個紙箱裝滿書，師傅不是機械人，搬到火起，後果不難想像
5. 如果有靚衫、西裝，可以要求搬屋公司提供掛衣箱
6. 決定搬舊傢俬到新居前，仔細評估一下傢俬是否捱得過裝拆搬抬，最重要留意是否有蟲。舊傢俬如果太殘又或者藏有曱甴卵、木蝨，花錢搬完隨時得個桔
7. 預留充足時間執拾，一般上班族四人家庭，如果每日執兩個鐘，加埋星期六、日全日執，都最少要預備一星期

搬屋很煩，不過每搬一次屋，小編都領悟到些少道理，尤其是要逆向思維去面對執屋的辛酸，例如：

• 搬屋其實是順便為你屋企「浣腸」，成間屋積存多年的廢物終於可以斷捨離，事後肯定有種無比暢快的感覺。小編出名集物狂，搬屋N次後，終於明白萬般帶不走的道理
• 如果他或她願意幫忙搬屋，可以相當肯定對方是你的真．朋友
• 新環境帶來新感受，搬到新居可以享受周圍的新鮮感
• 一邊執拾一邊翻看舊物，可以重溫一下過去的人生，緬懷往昔的好日子

大家下次搬屋，不妨問一問自己，除了身份証、護照、現金、手機，究竟我們需要帶走甚麼？搵一間信譽好的搬屋公司，善用迷你倉服務，都可以令大家的新居更安樂。最好的回憶，應該就在眼前，而不是只留腦海。